Autoritetet në SHBA ndalojnë përndjekjen e familjeve imigrante

0

 

Autoritetet e sigurimit të kufirit në Shtetet e Bashkuara thanë se kanë ndaluar përkohësisht ndjekjen penale të migrantëve që hyjnë ilegalisht në SHBA, së bashku me fëmijë.

Komisionari i Doganës dhe Mbrojtjes Kufitare, Kevin McAleenan, tha se përndjekja është pezulluar pas urdhrit të presidentit Donald Trump, javën e kaluar, që ndalon ndarjen e familjeve.

Ai tha se agjencia e tij dhe Departamenti i Drejtësisë duhet të gjejnë mënyra se si t’i ndjekin penalisht prindërit pa i ndarë nga fëmijët.

Trump nënshkroi urdhrin të mërkurën e kaluar, pas reagimeve të ashpra që ka nxitur politika “zero-tolerancë” e administratës së tij, kundër migrantëve nga Meksika që hyjnë në territorin amerikan.

Me politikën e tillë, autoritetet kanë ndaluar personat që kanë tentuar të kalojnë ilegalisht kufirin në SHBA – të rriturit i kanë dërguar nëpër qendra të ndalimit për t’u përballur me hetime për vepra penale, ndërsa fëmijët i kanë çuar në qendra të tjera ndalimi, larg prindërve.

Mbi 2,000 të mitur thuhet se janë ndarë nga prindërit ose kujdestarët në javët e fundit.

PËRGJIGJU